Պրոբացիայի ծառայության Լոռու մարզային մարմնի կողմից իրականացվող եռամսյա մշակութային ուղղվածությամբ վերասոցիալականացման ծրագրի շրջանակում մայիսի 18-ին՝ Թանգարանների միջազգային օրվա կապակցությամբ, կազմակերպվել է ճանաչողական միջոցառում, որին մասնակցել են մարզային մարմնում հաշվառված թվով 13 շահառու։

Մարզային մարմնի աշխատակիցների ուղեկցությամբ շահառուներն այցելել են Լոռի Փամբակ երկրագիտական թանգարան և գրող Ստեփան Զորյանի տուն-թանգարան։ Այցելության ընթացքում նրանք հնարավորություն են ունեցել ծանոթանալու տարածաշրջանի պատմամշակութային ժառանգությանը, ինչպես նաև ստանալ գեղարվեստական և հոգևոր հարստացնող նոր փորձառություն։

Միջոցառման նպատակը եղել է մշակույթի միջոցով շահառուների ինքնաճանաչման, հաղորդակցման և վերլուծական մտածողության կարողությունների զարգացումը, ինչպես նաև նրանց հասարակական վերաինտեգրման խթանումը։

Վերասոցիալականացման այս մշակութային բաղադրիչը նպաստում է շահառուների մոտ նոր հորիզոնների բացահայտմանը, գեղագիտական ճաշակի ձևավորմանը և հանրային օգտակար կապերի հաստատմանը։