Հոգեկան առողջության համաշխարհային օրվա առթիվ Պրոբացիայի ծառայության Սյունիքի, Արմավիրի, Վայոց ձորի և Լոռու մարզային մարմիններում հաշվառված շահառուների համար կազմակերպվել են սեմինարներ, հոգեբանական զրույցներ և քննարկումներ։

Միջոցառումների նպատակն էր բարձրացնել շահառուների իրազեկվածությունը հոգեկան առողջության վերաբերյալ, զարգացնել սթրեսի կառավարման և հուզական կայունության հմտությունները, ինչպես նաև ամրապնդել նրանց դիմակայունությունը կյանքի դժվարությունների նկատմամբ։

Սյունիքի մարզային մարմնի Գորիսի տեղամասում հաշվառված թվով 4 կին շահառու մարզային մարմնի աշխատակցի հետ մասնակցել է կլինիկական հոգեբան Նարինե Ավագյանի «Թվայնացող իրականության ազդեցությունը մարդու հոգեկանի վրա» թեմայով սեմինարին։ Քննարկվել են հոգեբանական դիմակայունության նոր մարտահրավերները, հուզական դժվարությունները, ճգնաժամային իրավիճակները, ինքնագնահատականը, ինքնակարգավորումը և հոգեբանական օգնություն խնդրելու կարևորությունը։

Արմավիրի մարզային մարմնում հաշվառված թվով 9 շահառու «Էջմիածին Երիտասարդների տուն, բաց երիտասարդական կենտրոն» հասարակական կազմակերպությունում մասնակցել է «Հոգեկան առողջություն» թեմայով սեմինարին։ Այն նպատակ ուներ շահառուներին ծանոթացնել հոգեկան առողջության պահպանման և ամրապնդման մեթոդներին, ինչպես նաև սթրեսի հաղթահարման հմտություններին։

Վայոց ձորի մարզային մարմնում հաշվառված թվով 5 շահառու իրենց ցանկությամբ հանդիպել են հոգեբանի հետ։ Զրույցի ընթացքում քննարկվել են սթրեսի պատճառները, դրա ազդեցությունը մարդու հոգեկան և ֆիզիկական վիճակի վրա, ինչպես նաև հաղթահարման արդյունավետ միջոցները։ Հանդիպման ավարտին շահառուները լրացրել են հոգեբանական թեստեր։

Լոռու մարզային մարմնի Ալավերդու նստավայրում պայմանական վաղաժամկետ ազատված և փորձաշրջանի մեջ գտնվող շահառուների համար անցկացվել է «Կոնֆլիկտներ. հաղթահարման և ինքնատիրապետման հմտություններ» թեմայով հոգեբանական միջոցառում։