Պրոբացիայի ծառայությունում մեկնարկած եռամսյա մշակութային ուղղվածությամբ վերասոցիալականացման ծրագրի երկրորդ փուլի շրջանակում կազմակերպվել է հերթական մշակութային այցը։ Պրոբացիայի ծառայության կենտրոնական մարմնի վերասոցիալականացման և վերականգնողական բաժնի նախաձեռնությամբ շահառուները այցելել են Երևանի ռուսական արվեստի թանգարան։ Միջոցառմանը մասնակցել է ծառայությունում հաշվառված 11 շահառու։

Այցի ընթացքում շահառուները հնարավորություն են ունեցել դիտելու 19-20-րդ դարերի մեծանուն վարպետների՝ Հովհաննես Այվազովսկու, Իլյա Ռեպինի, Վասիլի Սուրիկովի, Միխայիլ Վռուբելի և այլոց ստեղծագործությունները։

Թանգարանային միջավայրը նպաստել է շահառուների գեղարվեստական ընկալման խորացմանը, նոր մշակութային հորիզոնների բացահայտմանը և անձնական զարգացումը խթանող փորձառության կուտակմանը։ Նման այցելությունները կարևոր դեր են խաղում շահառուների հոգևոր հարստացման, գեղագիտական ճաշակի ձևավորման և հանրային օգտակար կապերի ստեղծման գործում։

Վերասոցիալականացման ծրագրի մշակութային բաղադրիչը միտված է շահառուների հասարակական վերաինտեգրմանը՝ մշակութային արժեքների ու արվեստի միջոցով զարգացնելով նրանց ինքնաճանաչման, հաղորդակցման և վերլուծական մտածողության կարողությունները։