ՀՀ արդարադատության նախարարության «Իրավունքի ամառային դպրոց» 2026 ծրագրի շրջանակում ապագա իրավաբանները լայն հնարավորություն են ստացել ծանոթանալու արդարադատության ոլորտի առանցքային ինստիտուտներին, իրականացվող բարեփոխումներին, ինչպես նաև Պրոբացիայի ծառայության գործառույթներին ու նշանակությանը:

Ուսանողների հետ հանդիպմանը բանախոսությամբ հանդես է եկել Պրոբացիայի ծառայության պետ Գուրգեն Աֆրիկյանը՝ ներկայացնելով «Պատժողական քաղաքականությունից դեպի վերականգնողական արդարադատություն. Պրոբացիայի ծառայության դերը արդարադատության համակարգում» թեման:

Բանախոսության ընթացքում Ծառայության պետն անդրադարձել է վերականգնողական արդարադատության հայեցակարգին, ծառայության առանցքային դերակատարմանը, ինչպես նաև պատժողական քաղաքականությունից դեպի անձի վերասոցիալականացում տանող ժամանակակից մոտեցումներին:

Հանդիպման ավարտին անցկացվել է ակտիվ քննարկում, որի ընթացքում ուսանողները ստացել են իրենց հետաքրքրող հարցերի պատասխանները՝ ծառայության գործառույթների, շահառուների հետ տարվող վերականգնողական աշխատանքների և հետագա զարգացման ծրագրերի վերաբերյալ։