Սեպտեմբերի 3-ին ավարտվեց Պրոբացիայի ծառայության և «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի համագործակցության արդյունքում Շիրակի և Լոռու մարզային մարմիններում հաշվառված անչափահաս շահառուների համար իրականացված վերասոցիալականացման ծրագիրը։

Ծրագիրը ներառված էր «Անձի զարգացում և հաղորդակցման հմտությունների ձևավորում անչափահաս շահառուների շրջանում» նախաձեռնության շրջանակում և բաղկացած էր երեք հանդիպումներից՝ յուրաքանչյուրը երկու ակադեմիական ժամ տևողությամբ։ Վերջին դասընթացը կրում էր «Ավագ դեռահասների մոտ դրական ինքնագնահատականի զարգացման և ինքնավստահության բարձրացման» թեման։

Դասընթացների նպատակն էր նպաստել դեռահասների ինքնաճանաչմանը, արդյունավետ հաղորդակցման հմտությունների ձևավորմանը և միջանձնային հարաբերություններում վստահ վարքագծի զարգացմանը։

Հանդիպման ավարտին անչափահաս շահառուները լրացրին հետադարձ կապի թերթիկներ՝ արտահայտելով իրենց նկատած դրական փոփոխությունները և առաջարկելով նոր թեմաներ ապագա հանդիպումների համար։

Այս նախաձեռնությունը կարևոր քայլ է շահառու դեռահասների սոցիալական հմտությունների ձևավորման և նրանց անձնային զարգացման ուղղությամբ՝ նպաստելով նրանց լիարժեք ներգրավվածությանը հասարակական կյանքում։